जनकपुरधाम । नेपाली कांग्रेस मधेस प्रदेश कार्यसमितिका सभापति कृष्णप्रसाद यादवले प्रदेश कार्यसमितिका उपसभापति चन्द्रेश्वर कुमार यादवलाई कार्यवाहक सभापतिको जिम्मेवारी प्रदान गरेका छन् ।
मधेस प्रदेशका मुख्यमन्त्रीसमेत रहेका यादवले मुख्यमन्त्रीका रूपमा व्यस्त हुनुपर्ने भएको भन्दै पार्टीका काम गर्नका लागि कार्यवाहक जिम्मेवारी दिएका कांग्रेस मधेसका प्रचार प्रसार समितिका संयोजक नितिशकुमार गुप्ताले जानकारी दिए ।
सभापति यादवले बिहीबार कांग्रेस विधान, २०७६ (११औँ संशोधनसहित) को धारा १३ को उपधारा १०(ड) बमोजिम प्रदेश सभापतिको आवश्यकताअनुसार प्रदेश कार्यसमितिको काम–कारबाहीलाई निरन्तरता दिन तथा पार्टी सङ्गठनका नियमित गतिविधि प्रभावकारी रूपमा सञ्चालन गर्न यादवलाई कार्यवाहक सभापतिको जिम्मेवारी दिएको उल्लेख गरेका छन् ।
पत्रमा सभापतिको अनुपस्थितिमा प्रदेश कार्यसमितिका नियमित काम–कारबाही, सङ्गठनात्मक गतिविधि तथा आवश्यक निर्णय प्रक्रियालाई विधान, नियमावली र पार्टीको स्थापित पद्धतिअनुसार निरन्तरता दिन अनुरोध गरिएको छ।
कार्यवाहकको जिम्मेवारीसँगै यादवले सभापतिको अनुपस्थितिमा नेपाली कांग्रेस मधेस प्रदेश कार्यसमितिको नेतृत्व गर्दै सङ्गठनात्मक गतिविधिलाई निरन्तरता दिनेछन्।
