बनेपा। रोशी गाउँपालिका–५ नागबेली स्थित ठाकुरानी तामाङको बारिमा रहेको बुद्धचित्त मालाको बोट काटेको आरोपमा माला ब्यापारी सिजन भनिने मानबहादुर लामा पक्राउ परेका छन् । काभ्रे प्रहरी प्रमुख एसपी बसुन्धरा खड्काले अनुसन्धानका क्रममा सिजनलाई पक्राउ गरिएको पुष्टि गरिन् । तर, संलग्नता पुष्टि भइनसकेको जनाइन् । प्रहरीले उनलाई पक्राउ गरेको र उनी विरुद्ध जाहेरीको तयारी भइरहेको अर्का ब्यापारी समिक त्रिपाठीले जानकारी दिए । त्रिपाठीले रुख मानबहादुरकै समूहले काटेको हुनसक्ने बताए ।
त्रिपाठी र मानबहादुर यस अघिका माला कारोबारका पार्टनर हुन् । उनीहरुको अघिल्लो वर्षको माला लुटेको विषयमा परेको मुद्दा विचाराधिन छ । समिकले पैसा र माला दुबै लिएको र संझौता विपरित अर्कैलाई बेचेर रकम कुम्लयाएको मानबहादुरको आरोप थियो । अघिल्लो वर्ष गरेको लगानी पनि फिर्ता नभएको र यो वर्ष पनि अर्कैसँग मिलेर माला किनबेच भएसँगैको रिसिबीले मालाको बोट काटिएको हुनसक्ने आशंका छ ।
गएराती अन्दाजी ०१ः ०० बजेको समयमा समुहमा आएका १५र२० जना अपरिचित ब्यक्तिले बुद्धचित्त मालाको रुख काटेका थिए । उनिहरुले सोही घरको ढोका र आगनमा ४ वटा घरेलु सकेट बम समेत राखेको पाइएको थियो । उक्र काटिएको रुख ठकुरानी तामाङको रहेको खुलेको छ । काटिएको रुख नजिकै जनमुक्ति सेना नेपाल लेखेको ज्याकेटसमेत फेला परेको थियो ।
