काठमाडौँ । पूर्वऊर्जामन्त्री तथा नेकपा माओवादी केन्द्रकी उपाध्यक्ष पम्फा भुसालले नेपाल विद्युत् प्राधिकरणबाट कुलमान घिसिङलाई हटाएर सरकारले जनतालाई आक्रोशित बनाउने काम गरेको बताएकी छन् । मंगलबार प्रतिक्रिया दिँदै उनले सबै क्षेत्रमा असफल वर्तमान सरकारले करिब ४ महिना कार्यकाल बाँकी रहेको पदाधिकारीलाई हटाएर जनतालाई आक्रोशित तुल्याएको बनाइन् ।
उनले भनिन्, ‘नेपाललाई लोडसेडिङको समस्याबाट मुक्त गर्न उज्यालो नेपालको सफल व्यवस्थापक र सिङ्गो देशलाई विद्युतीकरण गर्ने अभियानलाई सफल बनाउने नेपाल विद्युत् प्राधिकरणको नेतृत्व गरिरहेका कार्यकारी निर्देशक कुलमान घिसिङलाई बर्खास्त गर्ने सरकारको निर्णय सर्वथा गलत छ ।’
माओवादी पार्टी नेतृत्वको सरकार र पटक पटक मन्त्रालयको नेतृत्व गरेको बेला २ कार्यकाल कार्यकारी निर्देशकमा जिम्मेवारी पाएका कुलमान घिसिङले घाटामा गएको संस्थालाई नाफामा लगेको र जनतामा समेत स्थापित पात्र बन्न पुगेको भुसालले बताइन् । भुसालले कुलमानबारेको निर्णयले वर्तमान सरकार दलाल र माफियाको लागि कामका लागि बनेको स्पष्ट भएको जिकिर गरेकी छन् । उनले तत्काल निर्णय सच्याउन आग्रह समेत गरेकी छन् ।
